佔中開席前學生罷課打頭陣抗爭，感動唔少民主運動嘅戰將，紛紛貼當年學生相撐今時今日嘅抗爭學生。噚日網上有幾張相，惹起大家議論紛紛，事關驟眼睇落去，未必一眼睇得出係邊個！
有張九華四眼文青相，吸引唔少女士目光。貼相人話自己嘅學生時代，對政治不聞不問，直至82年做大律師公會主席，先至開始關心政治，眼見𠵱家罷課學生嘅民主路，比佢起步足足早咗20幾年，非常感謝學生們知難「不」退。
另有一張靚女相，唔少人睇得津津有味。有位長髮瑪利諾書院女生，少女時代嘅眼神都幾凌厲。𠵱家係一泛民政黨主席嘅佢留言話，中學時代busy，參加學生會、聖母軍兼為小學生補習，但冇試過罷課，好佩服𠵱家學生用和平抗爭喚醒市民。仲有張聖公會聖三一堂小學照，相中女仔係鬈毛，加上冇埋副眼鏡，唔知大家認唔認得出佢係邊位？（答案：A.劉慧卿，B.李柱銘，C.黃碧雲）