講起賭王何鴻燊四太梁安琪嘅長女何超盈，大家有乜印象呢？仲記住佢舊年嘅「迷銅」事件？事隔一年，超盈原來已轉型，由蒲開嘅銅鑼灣時代廣場，北望神州殺入人民網。呢次上鏡佢鼻上冇白色粉末，形象變得健康，而且不再迷糊，喺節目中大談「香港夢」，相信四太呢次會大讚愛女好出眾。
自爆成長多煩惱
超盈係以香港菁英會理事身份，接受咗《人民日報》旗下嘅人民網駐香港記者訪問。佢喺長約17分鐘嘅短片中，大讚港澳青年嘅國際性視野同創造力，值得內地青年學習，但承認自己唔多到內地，對內地了解有限，而呢個現象，亦係呢一代港澳年輕人嘅通病喎。
佢同時自爆「成長的煩惱」，話出生於較知名家庭，自細受唔少人注視，好在𠵱家已經克服咗呢啲煩惱；對於外界嘅注目同批評呢，就以「有則改之，無則加勉」嘅態度應對，同時大讚老竇賭王「取之於民、用之於民」，喺佢心目中直情係「超人」！
賭博最高境界，係願賭服輸，相信好多人認同超盈對賭王評語，而對比舊年喺銅鑼灣時代廣場附近，鼻上有白色粉末迷迷糊糊嘅「迷銅」look，今時今日嘅超盈可算相當精神。
而超盈「迷」途知「返」，加入菁英會呢個紅色富二三代俱樂部之餘，仲上埋官媒人民網幫手宣揚「香港夢」，相信當時好擔心阿女情況嘅四太，𠵱家終於可以安心；唔知佢會唔會學似媽咪咁，變身紅色政界女強人？
李八方
mailto:[email protected]