「股神」畢菲特向來無寶不落，最新英國《金融時報》就話，股神投資旗艦巴郡持有嘅私人飛機公司NetJets，準備進軍內地市場，仲話NetJets已經攞咗中國民航局發嘅飛行牌照㖭。
NetJets喺美國已經有50年歷史，佢哋用咗兩年時間先喺中國攞到營運牌照，準備以「Executive Jet Management」品牌喺中國營運，打算喺珠海金灣機場設基地，有兩隻私人飛機，服務廣東省南部、即係喺中國被視為較為有錢嘅地區。
佢哋嘅營運總監Robert Molsbergen話，據目前中國財富分配嘅狀況去睇，中國擁有100萬名百萬富翁，仲有好多超有錢嘅富豪，內地私人飛機實有得做咁話。咁又係呀，多幾個好似馬雲嘅科技老闆將公司搞上市，已經多好多富豪喇。