大編輯離開報界後,進入半退休狀態,只係受不住舊上司遊說,願意做一份兼職,為舊上司賣力搞特寫新聞。其他時間做乜嘢呢?就係追求個人興趣,重返大學校園讀書啦,暑假前已申請入讀中文大學歷史系嘅「比較歷史碩士」,佢嘅老友兼前輩吳明林極力推薦,公職王黃遠輝又啱啱讀完,今年畢業,話呢個課程值得讀,大編輯緊張咗一輪,知道得到中大取錄之後,高興到要請左丁山飲茶。
開學嘞,大編輯每到星期六就特別醒神,早上就返到大學火車站斜對面嘅「康本國際學術園」上導修堂及上課。呢日唔抵得,左丁山問佢上課上成點,佢話教必修科嘅梁元生教授(中大文學院院長)講上海、新加坡、香港海濱城市發展,史料翔實,信手拈來,夾敍夾議,令學生如沐春風,上完堂,竟有學生拍掌,佢話係大學時代未見過嘅場面。讀碩士(MA)課程者有二十幾歲學生,有近六十歲長者級人物,各人讀書需求不同,梁教授講課,可以令不同年齡階層學生皆歡顏,其功力之深厚可見一斑。
想聽梁元生教授講課,公眾有機會噃。新亞書院最近成立一個委員會,復辦1950年代嘅「新亞書院文化講座」,決定每年舉行四次,每次邀請有名望學者主講,復辦第一炮將在十月十一日(星期六)舉行,地點在農圃道六號前新亞書院、現新亞中學禮堂,主講嘉賓就係中文大學文學院院長兼中國文化研究所所長梁元生教授,講題係「當代儒學的三件新衣──港台新儒學、新加坡儒學與波士頓儒學」,歡迎各界人士出席聽講,時間係下午四時至六時。左丁山學識淺薄,只知新儒學似乎係講新亞錢唐牟三人著作思想為主,後來傳到去台灣,但新加坡、波士頓都有新儒學?波士頓可能係因為哈佛大學杜維明之故,但新加坡儒學對左丁山來講,就完全不懂,係時間要去上吓堂咯。
今個星期六(九月二十七日)新亞有另一重要演講,前星期到台灣領取第一屆「唐獎」之「漢學獎」嘅余英時校友已返回美國,於9月27日早上十時至十一時半作越洋視像演講「新亞書院與中國人文研究」,由新澤西普林斯頓家中傳來香港,由兩位新亞校友主持,新澤西方面有張洪年教授,香港方面有張學明教授,歡迎各界人士聽講。