港股終於企穩，但資金無換返去大價股，反而繼續猛火喪炒細價股，39隻股份爆升10%以上，唔少成交仲大得驚人，中國天然氣（931）成交額16.8億銀，高過工行（1398）及滙控（005），癲到暈！好多戰友在fb及WhatsApp問魏力買唔買得，經驗所得，通常出現呢個情況，隻股都接近見頂，升到街知巷聞，唔派等幾時？不妨睇吓今次準唔準。
iPhone 6極速炒燶，聽講係因大型連鎖零售店於開賣當日，一車車將啲貨送晒去先達，接貨接到驚，個炒價唔冧就奇啦！炒機搵唔到食，不如跟魏力早排建議買舜宇光學（2382），新高近在咫尺，目標先睇12.5元，買1萬股的話執1蚊都夠買iPhone 6 Plus！唔想跟風亂衝殼股，燒個冷灶可留意CW Group（1322），主要為企業提供一站式生產線設計、零部件採購及安裝等服務，服務行業涉及汽車、石油和天然氣等領域，門檻極高。申銀報告預期，今明兩年純利可增長五成，現價預測PE僅7倍，睇估值根本係must-buy，趁股價剛大成交撻着，點都要買番啲，10倍PE可見3.5元。
魏力
http://www.facebook.com/2012jason