特首女齊昕又有新搞作，噚日喺facebook賣廣告，留言問有冇家長想搵人幫讀中、小學嘅仔女補習英文，單對單學費收300蚊一個鐘，表示有質素保證㖭。
不過齊昕收嘅學費就被質疑太貴，有網民留言自稱幫中學生補習，應付國際認可嘅文憑試先收300蚊一個鐘，幫小學雞補習嘅話市價唔超過100蚊一個鐘，叫齊昕check清楚個市場價先賣廣告喎。剛烈嘅齊昕撐到底，馬上留言反駁，叫位網民先check清楚自己嘅質素先批評喎。不過花生友好快失望，因為呢個補習廣告同留言好快就被鏟走。
齊昕係特首女，幫襯佢分分鐘有機會入禮賓府學嘢，除咗學英文，仲可能會見到狼英，可以讀埋語言偽術初班，遇到梁太就上刻毒、涼薄、倒抽一口涼氣成語速成班，一舉三得，物超所值。八方亦好奇，689夫婦唔通冇畀零用錢齊昕，令佢要搵外快？