太古地產（1972）行政總裁（CEO）郭鵬計劃明年走去做科技創新公司嘅導師，不過，佢並唔係因為唔滿意明年初要調番去太古A（019）管數而劈炮，只係太地最近推出一個幫助科技創新公司創業嘅計劃，佢有份去做導師啫。
太地推出一個叫做Blueprint嘅項目，主要喺佢哋地頭太古坊，拎康和大廈兩層合共2萬平方呎樓面，其中一層畀300間蚊型科技公司以極低租金租用。另一層就係免租畀10間B2B公司創業，明年初有得用。
想免租創業嘅科技公司𠵱家至11月可向太地申請，被揀中，除咗有寫字樓用，太地仲會安排30位高層同埋本港企業管理人做導師，畀吓做生意嘅意見，當中包括郭鵬同埋系內太古飲料行政總裁賀以禮。
聞說，呢個Blueprint計劃係由兩位分別喺太地做咗2年同4年嘅「80後」管理見習生建議，郭鵬又好buy，所以話呢，後生提出嘅一套未必唔啱使㗎。