練馬師徐雨石呢晚搶錢咁搶，頭場草地直路賽爆完24倍「金威利」未夠喉，第三場三班1200米泥地，搵隻4倍次熱門柏寶操刀之「飛躍之駒」起孖，今季話咁快馬房已經有四W喺手，殺上練馬師榜第二位，咬到方嘉柏實一實。
柏寶上季騎過「飛躍之駒」，於泥地短途搏失做二奶，今場重新接手，順利贏馬將功補過，七歲馬累積五W全贏同程泥地1200米。不過呢場你諗都未必諗到，大熱門會係「好主意」，灰馬配潘頓跑未贏過之泥地，兩星期前整課泥閘一放到底撻着咗，可惜出賽撞正「飛躍之駒」呢匹泥地短途專家，後上不及屈居亞軍，但卻造由原本14倍，最後落重飛成大熱之8.2倍Q順利開出，涉及注碼約150萬，落飛黨扣本後獲利約1,100萬。第三名「大將風雲」又係郭能座騎，佢今晚復出，頭三場名次一樣均第三，仲未贏到馬。