唔知大家聽過12「碼」拉松未呢？唔係下年渣馬新項目，而係周二晚利物浦同米杜士堡喺英聯盃第3圈射咗15輪12碼先分到勝負！最後紅軍互射12碼贏14:13晉級。
由於周末要鬥愛華頓，利物浦呢場半力出擊，隊長謝拉特連後備都冇。紅軍嘅17歲小將羅薛達10分鐘遠射得手，但利物浦防守死球唔太穩陣，到62分鐘，米堡嘅佐治費恩特追平，法定時間踢成1:1。喺加時下半場，蘇索幫紅軍再度領先，但利物浦完場前輸球12碼，米堡嘅班福特射成2:2，兩隊要互射12碼分勝負。
艾度馬射失 紅軍贏14:13
喺頭5輪，米堡有班福特射失，而利物浦亦有史達寧宴客；比賽進入突然死亡階段。我求大俠諗，利迷肯定睇到心驚膽跳，射吓射吓，竟然連高路托尼、荷西安歷基甚至門將米洛列特都要出埋嚟射。射完11輪，兩隊全部在陣球員都射過晒，踢成10:10，由頭開始再射多次。直至第15輪，利物浦嘅蘇索射入，但米堡嘅艾度馬唔入，終於結束呢場12「碼」拉松。利物浦互射12碼以14:13擊敗米堡。
紅軍同米堡射足30次12碼，已經刷新英聯盃同英足盃兩大英格蘭盃賽嘅最長互射12碼紀錄。不過，呢場波仲距離世界紀錄好遠，據《健力士世界紀錄》指，球壇最長嘅互射12碼係05年一場納米比亞嘅盃賽，KK宮殿同公民射咗48次12碼，最後前者贏17:16。
羅渣士：靠意志晉級
利物浦領隊羅渣士賽後都話班球員意志堅強，特別讚羅薛達同埋佐敦威廉士兩位小將踢得好；但講到全隊發揮，羅帥都唔太滿意，「我哋表現唔係特別好，只係意志幫我哋晉級。我哋太多犯錯，喺比賽入面得到懲罰。我對第一個失波感到失望，第二球就更加㖭。」
識睇，一定係睇足英台【英波Live】：
http://soccer.appledaily.com
http://bit.ly/engballlive