美國拉斯維加斯驚嚇鬼屋FRIGHT DOME首次衝出美洲，聽日殺到山頂廣場！八方率先直擊驚嚇十足嘅恐怖世界，以德州電鋸殺人狂做主題嘅鬼屋，牆壁滿佈鮮血、掛滿血淋淋的人體及動物殘肢，參加者隨時被殺人狂魔追斬，勢要將港人「嚇餐死」。
八方同FRIGHT DOME兩名驚嚇大師傾過，佢哋親自傳授嚇人伎倆，指除了陰森恐怖的環境、音樂等必要元素，最重要是快、狠、準，即要準確拿揑嚇人時機。Drew及Terry是FRIGHT DOME香港嘅製作經理，除咗負責設計鬼屋，更訓練一眾「猛鬼」，由特技化妝至扮嘢嚇人樣樣皆能。Terry透露，玩家甚至可以化身英雄，拯救被困鬼屋嘅「受害者」，「有啲斷手、斷腳瞓咗喺地下叫你救佢，到時睇吓你有冇膽救人啦」。
二人平時都不時「鬼上身」咁，失驚無神嚇人，又聲言只需20分鐘，就可以將辦公室化身為恐嚇的鬼世界。Drew更透露，初步計劃FRIGHT DOME明年會繼續留港嚇人，規模及驚嚇度更會有增無減。