以往英足盃就叫爆冷溫床，勢估唔到今屆英聯盃都係，周二第3圈比賽再有兩支英超強隊落馬，分別就係阿仙奴（左）同愛華頓；阿仙奴一如以往以年輕新秀出戰英聯盃，周二主場對修咸頓就派遣祖爾甘保、貝利恩等新秀上陣，雖然靠阿歷斯山齊士先開紀錄，但修頓由杜辛泰迪治同尼達利基尼各建一功，反勝2:1。
愛華頓就肉酸啲，作客以0:3大敗俾史雲斯，開季至今竟然本土比賽贏過西布朗一場咁大把，後防仲立立亂㖭。不過話分兩頭，阿仙奴同愛華頓周六英超聯賽都要應付打吡大戰，阿仙奴要喺北倫敦打吡主場對熱刺，愛華頓就作客利物浦，踢默西賽德郡打吡，唔通兩隊都喺打吡戰前示人以弱？
識睇，一定係睇足英台【英波Live】：
http://soccer.appledaily.com
http://bit.ly/engballlive