今季熱完身再出之馬呢晚威晒，繼第二場「自動導航」取勝及第三場「獵豹小子」得第四後，第四場四班1200米蔡約翰馬房之「勁開心」學足「自動導航」咁，夥拍雷神匆出大熱建功，四歲馬苦戰兩季共11場，終於出頭；仲幫雷神呢晚跑完上半場已經起孖，準備再做騎師王。
「勁開心」馬主林兩鴻年前憑已退役之「勁有盈」贏過跑馬地百萬挑戰盃，沙田唔算係佢主場，呢晚可能預知可重溫久違之拉頭馬滋味，佢Call咗一班親朋戚友入場幫「勁開心」打氣，結果呢匹一面倒大熱門冇令台前幕後失望，二、三名分別係「頌友」及「無敵王者」。
今場最特別乃蔡約翰太太首次現身凱旋門，支持老公一齊拉頭馬，據知蔡約翰太太向來低調，今次肯露面，其中一個原因乃蔡太乃林兩鴻好友之故。林兩鴻說：「『勁開心』上次搏失得亞軍，都有少少失望，此馬是匹好靚的馬，我對牠十分有信心，今次愛駒大熱門，就知我們幾大信心啦。此馬跑1650米都可以勝任，我對牠的前景十分有信心，至於未來部署，我信晒蔡約翰。」