菲菲上星期有幸成試坐Tesla Model S，講真，真係好有驚喜。起步完全冇得講，推背感超強，就算只係揸70km，就算係坐後排，個個都話feel到非常強烈推背感。講到加速，更加冇得頂，經親身測試，由0km加速至100km只係用咗三秒！仲要架車超靜，完全冇摩打聲（因為佢真係冇摩打）。惟一唔鍾意嘅係，暫時Tesla只係得四門車，個人喜好雙門。結論係，呢架高性能電動車應該會好有market，所以真係可以買Tesla股票長揸！
講完長揸，就要講炒股，呢期講炒股，當然講殼股。綠色能源（979）市值只係得3.65億元，業績基本上四個字講晒：不堪入目，所以完全符合炒得起嘅殼股嘅基本條件。
隻股近年已轉型做環保能源，主要從事買賣生物清潔物料、發電機、建築廢料及廢料處理服務、小桐子種植園；生產及買賣生物柴油。再生能源發展一向受國策重點支持，為呢隻殼加多一個亮點。
值得一提係，自6月完成配售換股債券集資後，不斷有人將債券兌做新股，單係兩個多月，兌貨量已達1,600萬股！反映有心人睇好間公司，密密收貨。講技術走勢，噚日大成交，股價升8%仲破埋位，股價氣勢強勁，可以先買入一注博一博，分分鐘好似Tesla咁，一加速就快到冇影。
Fifi
http://www.facebook.com/lovefrystock
本欄逢周二、四刊出