由董伯伯帶隊嘅富豪訪京團，一、二、三線富豪都有份，見領導時嘅企位同座位係身份象徵，但原來坐邊架車都反映地位有幾尊貴。八方發現除咗誠哥、四叔等超級富豪有自己車直駛人民大會堂，其他人分成七架車出發。天字第一號車有團長董建華坐陣，嘉華主席呂志和同新世界主席鄭家純等巨頭都係乘客，車上有個香港人較陌生名字——張磊。
張磊乜來頭，可以坐上天字第一號車咁威水？42歲嘅佢原來係海歸派，2005年創辦高瓴資本（Hillhouse Capital），據講管理嘅資金達80億美金，主要投資內地互聯網創業公司，係內地最大私募基金之一。張磊喺《時代潮》2000年第10期嘅訪問中，稱17歲已入中共，所以放棄外國生活返內地。
捐8,888,888美元畀耶魯
佢似乎甚獲老董賞識，係老董創立嘅中美交流基金會13個董事之一。另一經典事迹，係2010年向母校耶魯大學捐贈8,888,888美元，俾內地憤青指佢有錢都唔捐畀內地。據香港公司註冊處資料，張磊有香港身份證。政圈盛傳佢同某政治局常委好close。