早排「民主真兄弟」老作公民黨會議記錄、抹黑佢哋勾結外國勢力，點知呢個「民主真兄弟」俾人踢爆作嘢後仲唔收手，最近又上載一張所謂支聯會10月9日會議傾嘅佔中糾察隊名單，入面有晒支聯會部份常委同成員嘅手提電話。
支聯會主席李卓人好嬲咁同八方講，呢份根本係假嘢，10月9日呢個會冇傾佔中、佢當日亦冇去開會、支聯會亦冇用會嘅名義參加佔中，所謂「佔中糾察名單」其實係六四燭光集會當晚嘅糾察名單，但呢個「民主真兄弟」竟然改圖兼加上佔中個名。阿人更勞氣嘅係，名單入面嘅手提電話號碼全部係真，大鬧咁樣公開呢班常委同成員私隱好唔道德。