蘋果iPhone6反高潮地炒到有燶味，仲一度傳出跌穿「招股價」，咁得人驚，據聞有位股評人亦發揮投資本能，果斷「抽飛」！缸湖傳聞呢位運動型股評人係和記電訊（215）旗下「3」嘅VIP，可以優先落order訂機，眼見炒價勢色唔對，前兩日收機之前，決定取消交易。
查實股評人界都有唔少「3」嘅VIP，雖然每部機都要跟上台合約，但最快喺上周五、香港第一日開賣就可以交錢拎貨，快人一步做iPhone6用家，所以唔少人都第一時間落order。
好似金利豐黃德几就幫父母同太太一齊訂，四部機全部自用、兼係土豪金iPhone 6 plus，仲話拎嚟炒「一啲都唔型」喎！同樣係開賣第一日就拎到貨嘅AMTD鄧聲興，買咗兩部金色iPhone 6同太太一齊用，簽咗24個月上台合約。