一登龍門,聲價十倍,阿里巴巴喺美國上市後,馬雲除咗荷包腫脹,國際地位亦忽然升級,好似美國前總統克林頓前日搞嘅《Clinton Global Initiative》(克林頓全球倡議)年度會議,馬雲就成為其中一位嘉賓,主持人係克林頓嘅愛女切爾西。
會上少不免講到阿里嘅成功之道,馬雲又再挑機,佢話阿里嘅成功,係因為大陸嘅商業基礎設施實在太爛,佢又批評,美國嘅電商唔係太有影響力,只係基礎設施好。馬雲夠膽喺人哋主場踩人,果然係今時唔同住日。
馬雲又自爆,阿里有70%買家係女性,賣家亦有55%係女性,所以佢要感謝女性,「沒有她們,阿里不可能到紐約上市」,講到咁誇張,華華睇到有啲網民回應話,普通成功嘅男人背後有一個女人,而馬雲背後有咁多女人,難怪佢咁成功啦。