【記者梁御和報道】「有票，真係唔要？」政府硬銷政改的宣傳廣告，惹來各界抨擊。承接大罷課抗命，尊子、張萬有、謝曬皮及阿塗等20多個本地知名漫畫家也被迫拿起畫筆走上街頭，本周六在旺角行人專用區發起《有畫，真係唔要？》活動，屆時各漫畫家會即場為市民免費畫人像畫，但市民收到人像畫前，人像會被加蓋特首梁振英的「核突」水印，寓意「你都係冇得揀」，讓香港人反思假普選禍害。
是次活動雲集21個老中青三代的本地知名漫畫家。發起人之一Kit Man指，活動構思源於政府早前硬銷政改的電視廣告，「個方案咁樣（有篩選），我哋一定唔會要㗎喎，但係政府竟然話『有票，真係唔要？』，實在太荒謬」。
各人商討下，決定於本周六（9月27日）下午，聯同多位義工到旺角西洋菜街行人專用區擺設繪畫人像的檔口，由多位漫畫家駐場，以鉛筆、木顏色、水墨及水彩等各自擅長的畫具，為途經市民免費速畫人像畫，「每幅畫預計會用5至15分鐘去畫，畫風就跟番唔同畫師自己嘅風格」，預計全日最多可為200個市民畫畫。
寓意市民「冇得揀」
活動特別之處，是漫畫家完成作品後，會在畫上加蓋梁振英的大頭水印，再送給被畫的市民。「寓意無論畫師幾認真咁畫，市民最後都只會攞到梁振英嘅樣，睇吓佢哋會唔會袋住先。」而畫紙背面則印有文案，向市民詳述活動概念，及解釋現時政改方案的篩選原理。在中環經營畫廊的Cathy，是活動義工之一。她指自人大常委就特首選舉落閘後，政府以宣傳大力配合，要求市民「袋住先」，「大部份人都信咗（政府）嗰一套」。所以她希望以公仔、漫畫這個令人更容易接收訊息的途徑，向市民解釋為何要堅持爭取沒有篩選的真普選。
活動除有尊子、張萬有等重量級漫畫家坐鎮外，還有多位新晉年輕畫師參與。現年24歲、中大藝術系畢業的Alice，本年2月開始在facebook開設「香城怪異錄」專頁發表政治漫畫，諷刺政府官員、建制派及內地遊客的言論行為，「香港𠵱家嘅政治情況好反智，希望畫出嚟畀大家笑吓，笑之餘都要反思」。
《有畫，真係唔要？》活動詳情
時 間︰9月27日（星期六）
地 點︰旺角西洋菜街行人專用區
各漫畫家當值時間
12:00—13:30︰尊子、方蘇、飯尾太郎、Afa Annfa、Kit Man@社漫
13:30—15:00︰梁阿平、白水：溫水劇場、林兆彬、許許許：香城怪異錄、彭啤、朱潼鶴
15:00—16:30︰張萬有、阿塗、多利繪、小花：小花插畫、Cinda Yue
16:30—18:00︰謝曬皮、Angryangry、Geeio、Lance Yan、Roni Wong
資料來源：上述漫畫家