「小小超」李澤楷嘅香港電訊（6823）今年5月完成收購CSL後，好快手就整合旗下幾個品牌，統一用「csl.」同「1010」兩個品牌，但其實佢哋仲有個同電訊數碼（8336）合資嘅品牌「新世界傳動網」未解決。聽聞香港電訊聽日有新品牌公佈，陪咗我哋17年嘅「新世界傳動網」可能成為歷史。
一聽新世界傳動網，就知同新世界創辦人鄭裕彤有關，當年電訊業當旺，彤叔就喺1997年成立新世界傳動網，輾轉喺2006年被CSL收購，其後CSL又將新世界傳動網四成股權賣畀電訊數碼。小小超𠵱家持有CSL，當然要盡快撇甩呢個咁有鄭氏色彩嘅品牌喇。