經馬主N介紹，認識咗一位以前在香港，現在長駐北京嘅高級行政人員，與體育推廣有關。問佢北京生活如何，佢話講生意就大有希望，因為中國畢竟人口多到無比，只要經營得法，手握名牌，營業額膨膨聲上揚，在香港發夢都做唔到。但過慣港式生活嘅人，呼吸慣香港空氣，就覺得香港即使有污染，與北京差得太遠，北京空氣有時令佢感到窒息，想逃回香港，此亦是不少Expat想搬離北京嘅理由；其次係「維穩空氣」，幾星期來，佢冇法子上Google睇香港政改新聞，當然fb係在禁止之列，即使有北京本地人教佢「翻牆」，以佢素來行規蹈矩嘅性格，亦覺得驚驚地，呢日在Harvey Nichols同佢飲下午茶，佢讚嘆曰：「香港空氣係好的。淨係用手機上網，啲資訊多到睇唔切。」
談到體育生意，UNIQLO嘅錦織圭球衣在日本大賣特賣，剛好錦織圭擊敗嘅對手祖高域，及在美國網球公開賽決賽贏咗俾錦織圭嘅施力治，三人同是UNIQLO贊助嘅，一時之間令A牌與N牌面目無光，推廣推銷體育產品，有名氣球員幫手，確係好重要。當然，球會名氣亦重要，好似皇家馬德里咁，一件作客球衣，搵到山本耀司做設計師，售價好似係三百幾美元，限量出售，仲要由國際紐約時報時裝版記者特別推介，令到中環嘅朋友B（皇馬擁躉）心思思，碰啱威靈頓街有間Y-3，就係山本耀司作品銷售店，平時左丁山唔留意，呢輪都要經過時做吓window shopping。
北京來客還有另外觀察，貴球衣要有球迷願意出錢至得，體育市場學第一方案就係要擴大球迷人口，例如美國籃球NBA，如有中國明星球員，就對開拓中國市場有幫助，姚明係超級巨星，但佢身高7呎7吋，萬中無一，中國球迷之中，年輕人有幾多個可以成為姚明吖？一個都冇。好彩，NBA居然冒出一個林書豪，六呎二三吋高，哈佛畢業，咁就恨死中國家長啦。六呎二三男子，中國滿街都係，孩子讀哈佛，係每個中國大媽嘅夢想，於是林書豪好易成為偶像，吸引大量中國男童打籃球、睇籃球，籃球人口一多，球衣、球鞋就有無限市場空間啦！
咦，林書豪係美國人噃，中國咪當國安第一，嚴防美國人影響嘅咩，既然iPhone 6都可以成為國安問題，林書豪如果紅得滯，中國可能禁咗佢都似，以免佢代表嘅美國價值腐蝕中國青少年呀！