「還記得iPhone照出一臉紅 還留住笑著離開的神態 當天整個城市 那樣輕快 沿路一起走半里長街」
兩年前，別人說我毒，卻只有你懂欣賞我，
別人說我炒機炒到Short咗，你卻說你最愛先達佬。
那些日子，我日收逾百部iPhone 5
你坐近我，問我為何滿面通紅
我說：天氣熱了，你說：真的很熱
那時候，秋意正濃，誰會料到，你體貼到為我預備下台階
終於，在iPhone 5見證下，我們走在一起
兩年後的今日，iPhone 6出現，而你卻說我失敗，失敗在未能應付「先達資金鏈斷裂」危機。
我說：十一黃金周後，明天會更好；你卻說：你最失敗是，搞唔掂Cable（有線：1097）
秋風輕送，把兩年的感情也送走，但身旁堆到人咁高的iPhone 6，卻仍屹立不倒
今天，在三百部iPhone 6圍觀下，你說，要走了。
「也許收機這條路 iPhone的懷抱 不夠讓我高攀進內才摔倒 踏上分手這條路 才令我突然看到 你的天空宇宙只夠我流淚 不可跳舞」
＊兩個月前＊
「先達BB，你又話你愛我嘅？」女人講得出「又話」呢兩個字，代表接下來會有一輪嘅批評等梗你，「愛，好愛。」「你又話幫我Cut Cable，講咗一年都唔做！」「唔係我唔想，而係我知冇可能，你難道覺得我惡過希特拉？」「我唔理！總之我一係同Cable分手，一係同你分手，你揀啦！」嘩！講到咁大，呢條問題同「阿媽同女朋友跌落水，救邊個先」一樣，咁陰濕。
我認，我很毒，但都很溫柔，為左先達妹，我決定挑戰呢件苦心志、勞筋骨，餓體膚，驚天動地，難度分值10粒星嘅壯舉－幫佢Cut有線！
傳說Cut有線係世上其中一個最磨滅意志、摧殘人類欲望希望嘅任務。要知道，要同有線CS對決，分分鐘好似應付Harry Potter入面嘅催狂魔一樣，吸走晒自己所有快樂。
不過我會記住，「怯，就輸一世」，話晒先達個個都係「英雄兒女」，如果輸，我又點對得住「先達佬」嘅名聲！我恐懼，但我不能退縮。我知，Cut有線唔止會有暗湧，仲會有巨浪！
接下來2個月，我開始我的苦行。你打去終止服務條Hotline，打到2046都打唔通；你諗住走精面，打去安裝熱線搵CS幫你Cut，點知佢又話要轉駁返去嗰條「耐力測試熱線」。
到你成功同佢鬥長命，有人聽電話啦，佢苦苦相勸挽留你又浪費一斷漫長時間。佢終於放棄，應承寄合約終止Form，但除咗佢係寄咗去地府外，真係諗唔明點解等一世都收唔到。
你想找佢晦氣，你又要Loop番上面幾個Step。你咪以為收到表格，就一天都光晒，佢無癩到話收唔到張Form，咁又收多你一個月錢。如是者，上述步驟無限Loop，Loop到我覺得要唱一句「盡情愚弄我吧！」無助、沮喪，遇著Cable，真係慘過撞鬼。
嘈又嘈過，鬧又鬧過，但有線這條線，慘過玩碟仙，易請難送。2個月過去了，我仍然Cut唔到有線。
有次，我見到Cable街邊啲Sales，我諗起一句歌詞「眉目裡似哭不似哭 還祈求甚麼說不出 沉住氣輕呼著煙圈 到唇邊 粗口急說出」
＊＊
今日，我竟然真係因為同有線分唔到手，而同先達妹分手。我蠢！早知找一千種藉口去說服妳就算，點會應承佢幫佢Cut有線？到呢個Moment，我已沒有心情去睇住我啲iPhone，點知，呢個時候，行家傳來一個WhatsApp：「今舖真係要唱非走不可啦！iPhone 6失守招股價，快啲有單Cut單，起碼Cut iPhone單一定易過Cut有線單！」
再上網望一望，新聞話Cable經過廿歲仔上門用開山刀Cut單事件後，今日網站斷約功能突然「復活」，只須3分鐘，就輕易可以同有線「分手」。
我望一望我堆蟹Phone，「然後睜不開兩眼 看命運光臨 然後天空又再湧起密雲 然後天空又再湧起密雲」
by千頌C@堆填區
http://fb.com/winbigwok