貪靚呢樣嘢，無分性別、不限年齡。話說成班大孖沙日前訪京，當中有唔少父子檔，除咗長實李嘉誠同李澤楷，亦有恒地李兆基同李家傑。呢個富豪朝聖團陣容鼎盛，一線、二線以至三線富豪到齊，但有傳四叔原本plan咗呢段時間去瑞士打羊胎素，但最終為咗習總推遲扮靚之行。據聞四叔仲同人講，佢成日戴住副超係因為眼袋做咗小手術，自揭謝老四chok爆黑超look之謎！
四叔此行訪京嘅造型令人刮目相看，因為佢除咗見習總嘅時候外，一直戴住副超出入，就連影大合照亦超不離身。唔少訪京團員笑指四叔忽然扮謝四哥，要走型格路線；但佢查實有苦衷，因為有人話見到佢除咗眼鏡後，眼部範圍有啲灰，原來做咗小手術！
與此同時，有傳四叔同唔少訪京團成員講，自己為咗習總而推遲去瑞士打羊胎素。86歲嘅四叔，皮光肉滑、駐顏有術，唔通真係唔打唔知身體好？其實佢以前話過，每日做運動、打坐同按摩各兩小時，真係養生有道。
超人父子分頭行事
有整形外科專科醫生話，羊胎素唔係喺面部打，而係由臀部肌肉打入去，佢都試過打，完全冇副作用，但去到瑞士扮靚，人哋通常會sell埋你打其他嘢，例如肉毒桿菌或透明質酸！醫生仲話，瑞士係打羊胎素嘅始祖國家，尤其係日內瓦，當年佢打一針要5至6萬，估計𠵱家閒閒哋要10萬。八方向恒地中人打探過，佢哋話四叔呢排冇trip要出，覺得係流料喎！至於四叔有冇打過羊胎素，私人事、冇人知！
有知情人士笑言，西環起行前力邀大孖沙面聖時發言，四叔係篤定人選，所以一抵埗就預告會向習總講明反佔中；對阿爺嚟講，認真畀面兼交足功課，加上阿仔李家傑賣力愛國，相信中央更加睇重佢個李氏王國。
至於李超人，據知都獲西環鼓勵發言。有指佢去到北京先知坐喺董建華旁邊第一個位，影大合照時更坐喺習近平左邊，確實係習總真正「老朋友」，識於福建，獲此待遇，其他富豪唔恨得咁多啦。至於李澤鉅缺席，原來佢兩父子分頭行事，因為長實每年9月底都有啲會要喺歐洲開，以往兩父子一齊出動，今次為咗習總，一個去中國、一個去歐洲。而恒隆陳啟宗，據聞因為捐咗好多錢畀董伯伯嘅中美交流基金，令佢此行水鬼升城隍，獲安排企喺習總後面搶晒鏡！
李八方
mailto:[email protected]