TVB（511）投資世界盃失利，搞到要裁員節流。今時今日，球迷要上網搵條link睇波，有幾難呢？TVB仲想挾世界盃來焗人簽長約睇收費台，管理層簡直和市場「脫晒節」。
TVB曾向投資者透露，今年上半年近5%的廣告收入增長，幾乎全是來自世界盃（即扣除世界盃影響，廣告收入增長是「零」）；以金額計，大概賺多了1億元。不過，期內播放費、分銷成本、人工等總開支，就按年上升了11%或1.67億元，至總數18.4億元。芬佬朋友說，TVB早講明，下半年成本升幅仍會和上半年「差唔多」；以此計算，即下半年公司總成本或會再增加多近2億元。
今次TVB裁員50人，海迪就當佢哋位位月薪4萬元（當然無可能），一年薪酬支出僅2,400萬元。而TVB截至6月底，員工總數達5,233名，即是次裁員數目，佔公司總人數不足0.1%。
咁說明咗啲乜？今次TVB裁員，慳到的是「有限錢」。公司是否有其他更有效的節流途徑，還是裁員仍會陸續有來？海迪唔知。不過內部盛傳，TVB正醞釀緊制度變革，其中一個迹象，是「殼王」陳國強的愛將、近年才加入的製作總監余詠珊，其「自己友」團隊，正分階段take over其他節目，包括是次受裁員影響的組別。這大概才是令TVB員工嬲到要着黑衣抗議的更深層次原因。
海迪
【動LIVE】萬人罷課 蘋果全程直播:
和平佔中: http://occupycentral.appledaily.com
YouTube: http://bit.ly/occupycentral