「人大落閘勢必反抗，9.22齊罷課。」香港專業進修學校罷課委員會成員許兆華說：「港專有唔少同學積極參與罷課，部份未有參與罷課嘅同學，同樣喺上課時繫上黃絲帶，以示支持。個別老師答允會替罷課同學補課，未至於打壓學生。」
另一名罷委會成員鄭發邦也說：「校方整體處理算寬鬆，如節省借用場地繁複嘅行政手續，方便罷委會集合同學，並請嚟老師、同學分享罷課目的。我哋未來數日會派同學代表到添馬公園支援。至於佔中，同罷課係兩個唔同嘅決定，等同學自行決定。」
好開心上「新鮮嘅課堂」
「學校話罷課當缺課，但今次好多謝我哋老師支持我哋，嚟到做中大採訪學習，可以同其他大學生一齊參與體驗。可能（在學校立場）罷課唔係一件好好嘅事，但今次係一個好好嘅學習經歷。以前我其實冇參加過罷課活動，或者係其他嘅社會運動，今日好開心可以參與到，係一個新鮮嘅課堂。可能（學生罷課）冇咩好大嘅作用，但係可以表達到我哋學生嘅訴求，表達番我哋自己嘅意見，令政府知道我哋要民主呢個訴求。可能未必真係咁影響到政府（的決定），但最後能夠講出意見，都係一個好嘅行動。」
學生抗爭實屬責無旁貸
「罷課係不合作運動嘅第一波，歷史上好多政制變革都係由學生開始，我見住香港𠵱家呢個時勢，不公義嘅事情不斷發生，嚟到呢個時刻，一定要走出來抗爭，作為學生係責無旁貸。作為藝術學院學生，係社會上其中一個發聲渠道，一定要企出來。
我擔心嘅前途並非自己人工幾高、接幾多show（表演），而係我哋所有香港人，未來喺香港仲有冇幸福美滿嘅生活呢？未來五日都會罷課，最大效力係喚起社區人民嘅關注，無論罷課、公民論壇等等，同學都喺社區宣傳，咩叫公義、咩叫民主，罷課就係喚醒人民抗爭嘅決心，係最重要嘅一步。
有啲演藝同學由一開始好抗拒，到後來參與並且表達意見，到今日嘅黑衣行，見到同學已經知道（政改）關自己事，一步步咁參與。」
屢被打壓代表擊中核心
「同學（罷課）係犧牲學習機會，希望香港嘅大人可以被喚醒。罷課越被打壓，代表我哋越做得啱，中國好鍾意用一啲人嘅口嚟挑釁我哋，好似李國章、左派啲人話罷課冇用，佢哋反對聲音越大，越代表我哋越擊中佢嘅核心。罷課活動能夠做到喚醒同學嘅良知，一萬人喺度聚集形成民意力量，俾香港同國際社會知道，爭取真普選嘅決心。高中嘅通識科啟蒙咗我，加上反國教當年12萬人聚集，學民思潮同學聯令我哋更容易投入學運。
𠵱家全港學校收窄咗言論空間，（中學生）唔好怕強權，即使佢禁制你都好，但你知道嗰啲係無理嘅禁制，冇理由嘅話，我哋點解要跟從？（學校）唔好再用強權或者父母式管教方式教小朋友，佢哋有獨立思考，佢決定咗罷課，你都吹佢唔脹，你（學校）唔可以強制他人嘅自由。」
期盼普選 打破政治冷感
「希望透過罷課可以喚醒市民，對中共畀我哋嘅假普選要醒覺，人大落咗閘之後，我哋唯一可以做嘅係公民抗命，作為學生要出來表達意見。五日罷課後，希望政府可以聆聽市民意見，市民希望有真正提名權，唔好淨係由1,200人選委會提名。
以往公大學生被認為政治冷感，但普選問題係全港問題，係大是大非嘅事，藉今次對普選嘅期盼，可以打破公大生政治冷感。（關於佔中，）暫時仍然在考慮中，佔中意義唔在於佔，而係要喚醒中產人士，佢哋係既得利益者，係佢哋係咪願意（佔中）；中產有社會經濟地位，如果佢哋出嚟佔中，對社會影響力大。」
政府收窄自由扼殺創作
「今日嚟係想政府關注我哋嘅聲音，人大一錘定音，咁樣落閘，so-called（所謂）嘅普選係中央篩選咗嘅普選，我哋覺得係唔啱、唔可以接受。我哋院長都幾支持（學生參與罷課），支持學生有言論自由、表達訴求，我哋都覺得幾warm（溫暖）嘅。我希望今次罷課，可以令身邊同學更加關心普選，雖然今日嚟嘅同學好多，但都仲有好多政治冷感、政治中立嘅同學。
罷課講堂中最想聽有關基督徒應否踴躍表達政見嘅內容，呢個都係我近日嘅內心掙扎。香港嘅言論自由係收窄緊，如果涉及政治嘅題材，例如文字去影射一些人物，政府都會特別關注。不過傳統不涉及政治嘅藝術創作空間反而更大、展覽機會更多。」
爭取民主後 冀帶往中國
「參與罷課行動，顯示自己嘅態度，支持民主。我會視乎情況（決定）係咪參加所有罷課日，可能最後未必可以成功爭取到普選，但至少顯示我哋係對佢呢個『袋住先』嘅態度好反感。
大家都唔企出嚟嘅話，就會最後真係袋咗，袋咗就會越來越差。香港要摸索番自己嘅民主道路，我哋應該係透過不斷抗爭，追求番我們香港嘅民主，如果到最後可以的話，成為全中國第一個地方有普選，希望將民主帶去中國。」
為不公發聲是公民義務
「東華學院全校得約1,800人，今次有約20人嚟，東華係小院校，好少參與學運。今次參加罷課，希望可以喚醒東華同學，呢個係佢哋嘅公民義務，我哋要向唔公義嘅政策發聲。今次東華得咁少同學嚟罷課，主要原因係大部份同學修讀護理課程，如果罷課，會追唔上實務課程同實習，加上學費又貴、同學家長反對學生罷課，認為罷課只係嘥學費。今朝早學校有大約六、七成學生，自發戴上黃絲帶，亦都參加自資聯校罷委會嘅默站行動，希望可以凝聚到同學一齊表態。」
【動LIVE】萬人罷課 蘋果全程直播：
和平佔中： http://occupycentral.appledaily.com
YouTube： http://bit.ly/occupycentral