【《蘋果》俄羅斯直擊】劉德華為撐洪金寶新戲，昨日千里迢迢去到俄羅斯客串演出，相當賣命，跳完樓又碌車頂，果然人在外地心情特別放鬆，每次提到女兒劉向蕙都噤若寒蟬的華仔，難得透露當爸爸的心情，坦言希望囡囡過正常人生活，絕不會讓她出鏡。而洪金寶就大爆向蕙記性好，每次見面都尊稱他做「大哥大」。
洪金寶（三毛）和劉德華自上一套電影《狄仁傑》至今，再次合作新片《老衛兵》，昨日華仔抵達俄羅斯海參崴外景拍攝現場，跟導演洪金寶認真研究大廈外牆跳車頂的戲份，三毛親身在場指導華仔演繹動作，三毛說：「上次同華仔係6、7年前拍《狄仁傑》合作，佢好耐冇拍我導演嘅戲。」在戲中華仔客串飾演一個chok爆小混混，生性爛賭嗜酒，有妻有女卻不顧家，跟現實中的華仔差天共地，而戲中飾演華仔女兒的陳沛妍，是繼《風暴》之後，再次做其女兒，果真有緣。
俄羅斯Fans求合照
回想當年與洪金寶合作，華仔說：「我嗰陣拍《夏日福星》時仲後生，長頭髮。𠵱家體能仍然OK，今日拍喺酒店逃亡出嚟，拍嘅動作唔係福星片，係實實在在。」現場所見，華仔在一棟大廈的外牆跳下跌落一輛私家車的車頂，狀甚痛苦，然後挾着偷取的鑽石逃亡。
華仔的粉絲遍佈世界各地，他去到俄羅斯等埋位時，仍有不少粉絲要求合照和索取簽名，華仔表示上一次踏足俄羅斯，已經是90年代跟關之琳在莫斯科拍攝音樂特輯《一起走過紅場的日子》，他慨嘆謂：「𠵱家就算再拍音樂特輯，亦冇平台播，𠵱家市場轉拍《花樣爺爺》。」
搞爛Gag避談女兒
對於《爸爸去哪兒》華仔有沒有興趣呢？他搞笑地說：「我未準備好，我問吓阿爸肯唔肯先，唔知我阿爸帶我，佢哋肯唔肯要。」華仔擺明答非所問，記者一再追問華仔是否不想女兒出鏡，華仔說：「梗係唔好啦！過番啲正常生活會好啲。」洪金寶聽到華仔提起女兒，即刻大讚華仔女兒記性好，他說：「佢個女見過我幾次，都叫我大哥大，成日掛住我，記性好好。」
王菲和謝霆鋒世紀復合，華仔表示從同事口中得知，對於二人戲劇性復合，華仔說：「人生就係咁，最重要覺得幸福，祝福佢哋。」
採訪：張俊銘
攝影：仇志德
【動LIVE】萬人罷課 蘋果全程直播:
和平佔中: http://occupycentral.appledaily.com
YouTube: http://bit.ly/occupycentral