恒隆地產（101）主席陳啟宗成家人上星期一齊飛去美國南加州大學出席捐款與學系命名儀式，低調到不得了嘅陳啟宗母親亦罕有現身，陳母喺相片中十分精靈，原來佢已經九十幾歲高齡，但據講仍然相當健壯，行得走得，絕對唔係眼又矇耳又聾嘅老人家，佢呢個星期尾仲會飛去天津參加恒隆廣場嘅開幕儀式㖭呀。
陳啟宗雖然成日嘴巴不饒人，但侍母至孝，一直跟媽媽一齊住，佢媽媽好少走上恒隆寫字樓探阿仔，但每年都會參加恒隆嘅春茗。
如無意外，陳母呢個星期尾亦都會去天津參與恒隆廣場嘅開幕禮，原因係佢對天津有感情，事關陳啟宗先父陳曾熙喺天津長大，亦喺天津識到陳母。
陳啟宗阿爺當年原本係好有錢，可惜爛賭，一晚可以輸錢輸走一條街。
陳啟宗早前就講過，天津恒隆廣場附近有幾條街，原本屬於佢哋屋企，但老早賭輸咗畀晒其他人。難怪佢一提起天津，就好似特別感慨。
【動LIVE】萬人罷課 蘋果全程直播:
和平佔中: http://occupycentral.appledaily.com
YouTube: http://bit.ly/occupycentral