上周二，孫柏文叫大家「不問價追酷派（2369）」。但之後兩日遇到花旗銀行出看淡報告，同埋佢哋會將銷售渠道改革兼炒人嘅新聞，令呢間喺內地4G手機銷售第一嘅製造商股價大插，現價潛緊水。喺新資訊下，我點睇？當然係更睇好酷派。
估中移上客太保守
首先講佢銷售渠道改革兼炒人。呢年幾來個個都話酷派呢啲手機商要轉賣機方法，唔可以再靠電訊商同啲街舖，唔轉會死。好啦佢哋喺報完破紀錄咁靚嘅中期業績後，就做要做嘅改革囉，我睇到時不知幾開心，因改革呢味嘢好似落雨收柴咁，最好喺好天做。不過佢哋一炒人，內地傳媒就鬧話係因佢哋唔掂！黐線。酷派話好快會交代攞十億元出來搞新銷售聯營公司嘅細節，唔通同打劫大盜嘅賊仔一齊搞？
再講啲大行分析員。以前做油股分析員時，好戥啲大行行家慘。原因係要預測例如中石油嘅盈利時，國際油價預測就好重要。喺我間行，估油價係我，而大行行家就要用紐約總部睇淡嘅油價預測，所以令佢哋估中石油盈利錯晒。
到今日所有睇酷派嘅分析員（高明上周喺佢篇「狗衝買入酷派」一文中講過佢哋通通看淡）喺計佢哋對酷派嘅預測中，究竟中移動（941）上到幾多4G客成關鍵。噚日中移宣佈8月單月4G上客有900萬，達差不多3,000萬人，但啲睇中移嘅大行分析員都仲係話中移4G全年「樂觀會有」5,000萬客！今年仲有四個月呀！
坐喺隔籬睇酷派嘅分析員，睇住得5,000萬客嘅預測，點調高自己對酷派嘅盈利預測呢？跟呢啲大行分析員做買賣嘅人，真係俾佢哋跣鑊甘。上半年中移4G上客1,300萬，都令酷派因大賣4G手機，收入升五成同賺多八成，PE得12倍。而家7、8月中移4G再有1,600萬人上客。都未計年尾四個月，酷派會點？
好快，睇中移分析員會調高預測，可能快到呢篇文未出街已上調，到時睇酷派嗰啲，就要淆底轉軚睇好！
孫柏文
獨立股評人
http://facebook.com/shuen
本欄逢周二刊出