九月十六日本欄講及「大學富者愈富」，指陳啟宗陳樂宗兩兄弟樂於捐輸俾大學，捐完巨款俾哈佛，又捐二千五百萬美元俾南加大，名揚美國學界，香港大專教育亦受惠。左丁山知識淺，只知道陳啟宗對南加州大學非常熱心，對南加大校友活動，歷年出錢出力，熱心見南加大新生之家長，感動佢地捐錢俾南加大。
有一位讀者EX來電郵告知：「陳先生1967年入讀加州州立大學洛杉磯分校California State University, Los Angeles（CSULA），得生物學學士及碩士學位，後來在USC（南加大）得MBA。CSULA在2000年向他頒授傑出校友榮銜。」
CSULA與UCLA當然不同，加州嘅州立大學有兩大系統，其一係UC（University of California），下面有柏克萊、UCLA、UC Davis、UC San Diego等等分校，皆在US News and World Report之美國大學排名前五十名內，一般稱之為名校。而California State U（CSU）係二綫大學，算不上是名校，左丁山孤陋寡聞，竟不知道陳啟宗就是CSULA學生，不過英雄莫問出處，叻人在邊度讀書就無所謂，始終會一飛沖天嘅，譬如田氏兄弟，大佬田北俊係San Jose State碩士，細佬田北辰係哈佛MBA，你話邊個更叻仔呢？好難分得出啩。
得讀者EX提醒，左丁山上網查CSULA網頁，查到該校在1999年（不是2000年）頒發傑出校友榮銜俾在72及74年畢業嘅陳啟宗。陳先生說話素來率直，佢去完烏茲別克參加一論壇回港，講到明係參加咗一個二流論壇，捐錢要捐俾哈佛呢類一級大學先至可以產生長期成果，因為呢類大學生至有一流天才去好好運用捐款做研究，佢講得都啱嘅，如果一間大學嘅世界排名不斷下滑，意味影響力減少，咁就難以吸引到世界級人物嘅大筆捐款咯。大學一旦向「下流」未必容易翻身，大學校長及校董會有責任𥄫到實也！
名牌大學可以吸引到一流捐款、一流學者與超級學生，哈佛係其中之一。最近一宗誹謗官司透露，有學生入唔到哈佛而入咗史丹福，感到「心碎」，「夢想破滅」，你話哈佛幾巴閉吖。但入唔到哈佛，又未係咁大陣仗嘅事，左丁山最近見到林奮強「黃金五十」一個暑期工，醒目到極，呢位女孩子原來係女拔尖子，考SAT得2400分滿分，但哈佛拒收，結果入咗普林斯頓讀政治，都唔知讀得幾開心，早已忘記甚麼哈佛咯！