中電新能源（735）對口係國務院國資委，市值得同樣對口都係國務院嘅光大國際（257）一成多啲，PB大折讓咗82%，中電新能源殘爆！
中電新能源阿媽中國電力新能源有限公司，又hold咗集團5%樓上權益嘅，有中國海洋石油總公司同長江三峽集團，全部直屬國資委，總計揸咗中電新能源權益67.9%。
又阿媽2008年時，行使可換股票據，成為中電新能源大股東，當年行使價每股1.27元，中電新能源現價（0.54元）潛水57%，又比起2007年高位1.64元，跌咗66%，家陣PB得0.68倍。
PB 0.68倍平絕同業
上邊光國，現價係接近歷史高位嘅10.74元水平，比2007年高位升咗1.4倍、3.7倍PB，市值480億元，係中電新能源近8倍！同樣對口級數，中電新能源PB，平咗80%。
場內阿媽夠級數嘅，有北京發展（154），話搞垃圾發電，搞咗N年之後，家陣先參與番多啲項目，半年仲係蝕緊水，PB炒到上3倍。又京能（579）近1.8倍PB、華電褔新（816）2.5倍，中電新能源又係平咗截。
再講，中電新能源環保潔能瓣數樣樣齊，一啲唔失禮，集團啱啱公佈冇耐今年半年成績單，純利溫和增長3%，到1.6億銀人仔。仲要咁睇，中電新能源期內嚟自政府補貼金收益，得1,050萬銀人仔咁大把，上邊京能，所講補貼或補助金收益，高達4.9億銀人仔（半年純利6.7億銀人仔）。中電新能源業績實實淨之餘，嚟緊日子，一樣有機會好似光國咁，俾阿爺湊到肥肥白白。
買中電新能源，當上返NAV 0.8元計數，都要升48%，1倍PB，未有耐追到任何行家，同阿媽嘅入股價，值博。
錢雋
細價股專家
本欄逢周二、三、五刊出