【壹週刊】阿朗跟女友Kathleen為結婚籌謀新居，男主人愛錫女友，家居設計由她話事。廿多歲後生女，難得有自己天地，一臉滿足地分享︰「我要田園風，要有碎花，有白色同木色就最好。」如是者，四百呎的空間帶點小女生的感覺，就連書房櫃、梳化都用桃紅色，男友沒甚要求，看到女友笑逐顏開他便心滿意足。
首次置業未夠錢買市區樓，阿朗唯有選擇元朗的大型屋苑二手樓，翻新裝修亦要睇餸食飯，預算最多廿零萬，「我哋有好多雜物，最需要大量儲物櫃，貪方便可以將所有嘢放入去收埋，最好不要俾我見到，哈哈。其次是不須要太花巧，夠地方給朋友上來吹水就OK。」阿朗再補充，他跟女友都是海賊王模型忠實粉絲，絕對要有個飾櫃讓他晒冷。
兩小口的家以白色為主，地櫃、房門都有花線設計，最搶眼是房門前裝了盞彩色泡泡燈，非常有派對氣氛，加上女友精心挑選的桃紅兩座位梳化，活像少女部屋，「連同飯枱餐椅都是我在Francfranc揀，可能屋細似日本，傢俬都好合尺寸，IKEA的梳化座位好深，質量又無咁好。」女孩子明顯是崇日一族。
男主人阿朗對裝修無意見，更支持女 友到底，「我本來對翻新無乜期望，估唔到出嚟效果幾好。」他最高興是翻新後的廚房完全脫胎換骨，還主動拿出手機，展示原來的廚櫃有多不濟，「現在全換了黑 玻璃，好靚；不過平日我都返阿媽屋企食飯，週末女友才過來煮飯仔。」廚房亦換上兩道黑玻璃門，又型又cool，但黑色玻璃遇上油煙，污漬及指模便無所遁形，點算？阿朗好醒，先換了更強力的抽油煙機，將火爐換成電磁爐，偶然用玻璃水清潔，三重功夫不可少。
設計師更預留不少白牆，原意是給他們掛相突出個性，但兩個大細路入伙半年還未動工，至於邊個負責執屋？兩位八十後都異口同聲說怕怕，「太辛苦啦！」