第二屆「公益金會德豐百萬泳」噚日喺淺水灣舉行，身為游泳健將嘅會德豐（020）主席吳宗權冧莊做籌委會主席擔大旗，吸引到唔少30、40歲嘅富二、三、四代除衫落水，晒肌晒腩。吳宗權固然養眼，年近50嘅行會成員陳智思亦令人眼前一亮啊！
陳智思年輕前患過罕有嘅血管收縮病症高安氏動脈炎，做過多次手術，所以一向重視健康，注意飲食，晨早5點就起身做gym。睇佢𠵱家嘅身形，估計佢今年初通完波仔後，仍有運動，否則冇可能keep到呢身肌肉。年近50都可以咁弗，都算係咁喇。
但身形弗唔等於游水似飛魚。陳智思參加嘅領袖賽，今年共有13人參加，游200米，陳智思表現麻麻。佢上水後都話，唔太滿意自己嘅表現，解釋係少游海灘，覺得啲水比較濁，搞到「游游吓唔知自己游咗去邊！」佢賽前冇特別備戰，平日一星期游一次水，唔使包尾已經收貨咁話。
劉鳴煒除衫即露腩
吳宗權就一貫倒三角身形。佢參加咗公開賽（以10分28秒得亞軍）、企業接力賽同埋領袖賽，後面兩個比賽都三甲不入。佢話自己表現算OK，游完兩項比賽，到最尾領袖賽時已經無力、好攰。
最估唔到，係平時穿起西裝、睇落都算弗嘅華置（127）主席劉鳴煒，一除衫就露出一圈士啤軚，加上皮膚白滑，應該冇乜同陽光玩遊戲。利豐（494）老闆馮國經兩位公子馮裕鈞與馮裕津，身形似爸爸一樣圓碌碌。
領袖賽冠軍由「鋼鐵大王」龐鼎元家族成員孫龐超貽奪得，成績3分11秒。馮氏兩兄弟與劉鳴煒三甲不入。
李華華
mailto:[email protected]
【動LIVE】萬人罷課 蘋果全程直播:
和平佔中: http://occupycentral.appledaily.com
YouTube: http://bit.ly/occupycentral