蘋果iPhone 6上個禮拜五又成為焦點，本地炒家炒到去深圳華強北路，轉售賺人仔。就咁睇做iPhone炒家好好賺，實際上蘋果公司先係大贏家。蘋果公司推出10部iPhone，每次都將「蘋果Hunger Game」推至極致；消費客戶亦非常配合，每逢有新機定必搶咗先，搞到呢股蘋果phone潮長玩長有。
蘋果今次推出iPhone 6，最高招嘅地方將蘋果Hunger Game調轉玩。猶記得舊年iPhone 5登場，中國係首輪開賣國家，食盡內地市場需求。今次iPhone 6中國首輪開售冇份，就吊足強國果迷胃口。五年前蘋果公司近乎跪求式打入中國。舊年仲有強國客投訴，蘋果喺內地嘅地區維修政策有偏差，蘋果總裁庫克唔想失去呢個市場，破天荒發道歉聲明。
蘋果都要跪低，因為強國真係強得有道理。睇睇蘋果公司今個財年第三季成績表，iPhone銷售增加9%，絕大部份來自中國。而蘋果公司嘅盈利增長，當中近半又係來自中國。更重要嘅係，中國13億人口，智能手機需求大，蘋果公司至今只係分到塊餅仔。睇返Gartner統計資料，中國智能手機銷售舊年升咗一倍，蘋果市佔率只係得8%，換言之增長空間強勁。即使今次強國iPhone 6並非首賣國，相信仍可以繼續幫蘋果利潤加加甜。
C+B
本欄逢周一刊出
【動LIVE】萬人罷課 蘋果全程直播:
和平佔中: http://occupycentral.appledaily.com
YouTube: http://bit.ly/occupycentral