【壹週刊】法國經典文學《小王子》係全球最受歡迎嘅小說之一，今年7月，小王子第一個主題公園終於喺法國開幕，Fans們仲唔快啲去朝聖？
由外太空而嚟嘅小王子，走訪唔同星球，所以主題樂園最大特色，就係多個同飛行有關嘅設施。樂園入面有一個空中酒吧，遠看似一隻氣球船，可以帶最多15位乘客升上35米高空，一邊飲酒傾偈，一邊欣賞周邊嘅怡人風景。
空中酒吧最大賣點係開放感，平時去所謂嘅空中酒吧，腳底下總會有玻璃，今次雙腳吊吊掂唔到地咁飲酒，真係第一次。所以與其話係酒吧，其實似機動遊戲多啲。每個座位上都有安全帶，不過手機電話就比較危險，一定要揸實。空中酒吧其實用電推動，上升速度好穩定，即使打風落雨都可以照常運作。
上到頂點可以眺望法國東部一帶，天朗氣清嘅話仲可以睇到阿爾卑斯山及德國嘅黑森林。記得喺入口嘅小食亭買定杯紅酒、白酒、香檳，喺靚景襯托下飲酒，仲有靚仔工作人員介紹附近風景，真係好爽呀！
主題公園位於法國東部嘅Mulhouse，地點嚟講唔算方便，原來選址呢度係因為天氣穩定，被法國及瑞士嘅山脈包圍著，風速較穩定，令招牌的熱氣球的運作較容易。公園有兩個大氣球，象徵可以好似小王子一樣遨遊世界。
氣球可以升上150米高空，可以睇到一望無際嘅法國田園美景，更加可以俯瞰整個樂園，由上面望落去就可以見到，樂園設計成圓形，係用星球呢個idea，都真係幾靚。
基於安全理由，公園會根據風速決定載客人數，每次介乎10至30人，如果風速太大，氣球就暫停開放架喇。所以到訪之前，check定天氣先出發就最穩陣喇。