我求大俠幾時都話，皇家馬德里似一間搵錢嘅商業機構，多過一間足球會，貴賣貴買財技一流，簽入哥倫比亞中場占士洛迪古斯及墨西哥前鋒查維亞靴南迪斯，仲幫到會長佩雷斯喺兩國嘅建築生意。上周六皇馬踢迎合亞洲球迷嘅早場，當然要盡顯佢哋嘅攻力，作客以8:2大數拉科魯尼亞，基斯坦奴朗拿度（C朗）入3粒，占士洛迪古斯（J-Rod）同查維亞靴南迪斯（小豆）各入世界波，賭友真係收錢收到手軟。
演入球騷搶收視
皇馬上周中歐聯狂勝巴素利5:1，今次對住重返西甲嘅拉科，同時間英超就有阿士東維拉對阿仙奴等比賽，銀河艦隊要肩負搶收視呢個責任，入球更加多；29分鐘C朗頭槌建功，為大勝揭幕，J-Rod之前傳過同C朗等新隊友唔夾，不過好快就用行動證明自己身價，36分鐘禁區頂勁射死角入網，連續兩場比賽入波。
小豆首次遠射入兩粒
皇馬之後入球源源不絕，C朗連中三元，加里夫巴利亦梅開二度。曼聯今季散貨兵團，已經有香川真司、韋碧克入波，小豆亦不遑多讓，下半場76分鐘後備入替，88分鐘先禁區頂左腳「腳趾尾拉西」直飛網角，幫皇馬攻入第7球，兩分鐘後又放冷箭，撞到拉科後衞彈高，入到球隊第8球。雖然拉科都入兩粒，不過仍以2:8大敗。
皇馬攻入8球，破咗球會西甲客場入波紀錄，足智彩個「讓球主客和」「客勝」固然打風都打唔甩，即場投注開「入球大細」去到8.5/9球，「下一隊入球」開到第10球，都順利開出，長追皇馬隨時贏多幾注，真係收錢收到手軟；皇馬下次再踢周六早場，大家就知點做啦！小豆原來踢咗曼聯4年，上陣154場都仲未喺禁區外入波，今次竟然遠射入兩粒，佢就好開心咁講：「我外借到皇馬就係為咗入波，今次係好開始，不過我唔會自滿，以爭取更多上陣時間為目標。」
識睇，一定係睇足英台【英波Live】：
http://soccer.appledaily.com
http://bit.ly/engballlive
【動LIVE】萬人罷課 蘋果全程直播:
和平佔中: http://occupycentral.appledaily.com
YouTube: http://bit.ly/occupycentral