九月十七日中午，與馬主N在波士廳飲茶，講吓當晚賽事，講講吓，馬主N突然收到短訊alert，話英國博彩公司Betfair對公民投票否決獨立（NO）極有信心，突然在未開始投票前，已開始派彩俾Vote No人士。當時嘅民意調查正顯示No與Yes雙方打得難分難解，何以博彩公司咁大方提早在九月十八日投票前就派彩俾投注於No嘅人士？博彩投注係真金白銀嘅民意調查，Betfair透露，下注人士之中，下注No嘅佔大多數，故此賠率不斷變動，投注Yes（即贊成蘇格蘭獨立）嘅賠率超過4倍，下注No嘅賠率只得1.25至1.29倍，除咗Betfair之外，其他博彩公司嘅Yes賠率有3倍至4倍，No嘅賠率介乎5賠1至9賠2之間，好唔抵賭箒，轉化為勝出機會率，就係No嘅贏面有七至八成。本文見報之日，已知蘇格蘭公投結果，就係：No贏，蘇格蘭人拒絕脫離英國獨立，統一派得票率係55.3%，Yes（獨立派）得票44.7%，獨立派唯有認輸。
英國有不少博彩公司，養埋各式各樣嘅研判專家，因判斷錯誤會搞到賠率出差錯，銀紙攸關關係，故此呢啲專家絕對係睇數據，絕不感情用事。呢類人在社會上，甚為罕見。尤其是講到政治與家庭，情緒與感情及歷史因緣嘅重要性高於一切，一談到民族感情，乜嘢經濟數據，社會數據都拋諸腦後，正是粵語所云：「一於打死罷就」。呢呢，九月二十二日就有學聯發動大學生罷課，反對「鳥籠民主」，爭取真普選，明知不可為而為之。本來大學生罷課，以香港學生本性，唔會搞得好火爆嘅，參加嘅人未必一定好多，但建制派嘅大人物往往係惹火尤物，在敏感時刻就跳出來講甚麼學生受人煽動，美國人搞嘢，學生易變成紅衛兵搞文革，學生不退學就不是犧牲等等廢話，當然不會平息事件，反而更加刺激溫和派大學生加入罷課陣營，聲勢會大好多，此正是毛澤東所云，建制派搬起石頭打自己的腳。大學生參加罷課，如牛唔飲水唔㩒得牛頭低，講有大人、黑手、美國人在後操控「煽動」，好侮辱自己智慧嘅啫。左丁山先母唔識字，冇讀過書，一味識鬧左丁山唔夠勤力，英文唔好就搵唔到食等等。好似係大學三年班時，中大生搞罷課，阿媽就日日話：「聽人講大學生會罷課，你千祈唔好俾人呃你去參加呀。」左丁山唯唯諾諾唔敢講，因為罷課搞手之一就係自己吖嘛！
【動LIVE】萬人罷課 蘋果全程直播:
和平佔中: http://occupycentral.appledaily.com
YouTube: http://bit.ly/occupycentral