【本報訊】18歲前，年年考第一、傑出學生，他的全世界，是元朗，直至考進Google，走出元朗，原來天外真的有天，「嗰度唔係牛津就哈佛，聰明過你又勤力過你，連捉象棋，都捉到攞世界冠軍。」遊走大世界，辭工回港，重回他熟悉的屋邨，創立跨文化社企ICE，不教人考哈佛、牛津、劍橋、MIT，請非洲農民談公平貿易、韓國人講韓戰，在屋邨瞬間看地球，他是Freddy羅偉鴻。
記者：呂麗嬋
周六早上9時，位於朗屏邨的元朗東華三院盧幹庭紀念中學，人聲沸騰，「我係你哋師兄，以前，我就坐喺呢個位……」，Freddy與德國籍拍檔Till，與學生玩遊戲熱身，課室笑聲不絕。這天，工作坊請來非洲講者，分享家鄉生活。公平貿易，不再只是咖啡豆包裝袋上的簡介。「Freddy好有心，我哋啲學生大部份來自基層，唔係咁多機會接觸到唔同國家嘅人。」副校長譚美玲說。
建立價值觀與世界觀，遠比公開試成績單上的星星重要，這說話，美好得超現實，但29歲的Freddy深信不疑。他的「另類創業故事」，要由考進Google說起。
當年爭贏3,000人獲聘
07年，Google設於印度海德拉巴市的亞太區總部，招聘人才，一個職位，應徵者3,000人，理大英語及商業系畢業的Freddy，是該年唯一獲聘的香港人。「要面試六、七次，印度考官問我有無去過印度，我滔滔不絕，講咗廿分鐘。」面試4分滿分，他拿下3.9分。
19歲的青春壯行，無心插柳，成為他贏得聘書的最強武器，「嗰時好憤世嫉俗，大學一年級，同學去歐洲，我全副身家一萬蚊，只夠錢去印度。」自小讀書成績超班，三兄妹排第二，自信爆棚，小時候父母做小販，賣海味雜貨，在朗屏邨長大，那次，是他人生第二次坐飛機，第一次跟團去泰國，五個大男孩，還煞有介事剃了光頭。「Google鼓勵夢想，入去做嘢，係我人生另一個領域。」
靠海味店兼職幫補開支
在Google工作，何其美好。返工有專車接送，五天工作，另享一天發夢時間，公司還承諾，百步之內，一定有汽水零食。大學畢業、揾到份人人艷羨的超級筍工，以香港標準審視：夫復何求？在印度，他遇上最聰明富裕的Googler，也遇上最貧窮無望的街童，一整天「奉旨發夢」，讓他反思人生，「繼續做，可預視未來生活，喺一間公認好嘅機構升上去，但咁樣，係咪代表就係我追求嘅生活呢？」
4歲撞車斷手，住院半年；14歲在大陸，揸大膽車重創，「我問自己，若24歲係人生大限，只剩一年，有咩我想做但未做？」思前想後，他作了一個最違背香港人追求穩定生活的大膽決定：婉拒了派駐北京新辦事處人力資源部門的聘約，「嗰時同屋企人講，畀兩年時間我，呢兩年，我畀唔到家用，就當我去當兵吧。」基層父母無所求，見到他大學畢業已覺功德圓滿；做老師的大哥又顧家，「冇佢哋，我未必做到想做嘅嘢。」他說。
離開Google，他透過國際大學生組織AIESEC，展開長達一年的歐洲之旅，遊走馬其頓、希臘、保加利亞及匈牙利等廿多個國家，參與學生培訓義務工作，為回港創辦社企Inter Cultural Education（ICE）取經，對準無法周遊列國參加交流團的基層屋邨學生。現時，ICE團隊的12名導師，來自不同國家，也有本地大學生。課室內穿爛牛仔褲的德國籍拍檔Till，便是牛津碩士，因為認同理念，捱低薪加入，是他的最佳拍檔。
「呢類課程，對香港學校嚟講比較新，學生反應好，但也有老師反映：Freddy，課程教人要有夢想、有廣闊嘅視野，係好事，但你嘅班底咁勁，不如都教吓學生點入牛津啦。唔係我哋現實，係家長現實呀。」
要打破籠牢的價值觀，長路漫漫，他苦笑。現時還得在表哥的海味店兼職，幫補社企開支，但他說從不後悔。「我成日諗，若我讀中學時，已知世界原來咁大，肯定可以走得更遠」。覺得正確，勇往直前回歸元朗，原來一樣天大地大。
