今期重頭戲係第八場一班1400米廣東讓賽盃，當中東廐「美麗之星」來港前，曾喺英國皇家雅士谷賽期嘅27駒場合，高獎金1600米賽事大不列顛錦標勝出，所以曾被寄予厚望，認為足以問鼎香港打吡大賽；結果「美麗之星」上季於打吡只跑第八，不過告東尼對佢嘅實力仍充滿信心。
告東尼說：「牠競逐對上三場，包括打吡一役時，其實都有關節疼痛問題，但仍取得一亞一季，喺一班賽亦只不過輸條頸，足見質素非凡，相信今季健康改善下，表現必可大躍進。上半季目標係出戰國際賽，但就會先出爭11月的二級賽馬會一哩錦標。」
馬主莎莎老闆郭少明本月6日接受蘋果動主播Paris陳穎訪問時，亦講到明旗下多駒中，今季對「美麗之星」寄望最高，皆因上季隻馬受健康困擾，根本去唔到理想水準，但接受手術後，進度完全唔同晒，有望見番應有真面目。
「美麗之星」本月10日試大閘，由蔡明紹策騎全程領放，末段走勢流暢，僅於終點線上被超越，告仔對佢嘅走勢好滿意，指出現時狀態就算未達巔峰，但亦所差不遠喎！