禮拜日第七場二班賽出馬好少只得九隻，但就相當有睇頭，「英勇大師」、「追風駿足」、「華麗登場」及「天時駿駒」，咁啱都係上季三捷嘅質新當打馬，隻隻公認實力未見盡，稱得上一場小型嘅明星馬大戰。
如果計賽績，「英勇大師」或者可以睇高啲，因為佢係上述四駒裏面，唯一一匹二班上過名，其他三隻就最叻只贏三班。另外「英勇大師」今仗回配韋達，亦係利好因素，事關呢匹後勁強橫嘅怪物好有靈性，專恰二線騎師，上季蔡明紹騎兩次都操控麻麻搏輸，搞到馬主施雅治唔開心；而6月尾配二線洋將郭能，末段唔聽指揮急劇斜跑，郭能要停止催策，結果輸個鼻位僅敗。
相反「英勇大師」配一線嘅五屆意大利冠軍杜滿萊，走勢就好規矩勝出，而級數更高嘅韋達，亦收服到呢隻馬，上季兩度合作勝出，不知幾聽話。加上韋達今場操過「華麗登場」唔騎，最終揀「英勇大師」，更加可以話不容有失。
韋達接受訪問時亦指出，「英勇大師」今季進一步成熟步，賽前準備充足，試閘走勢好好，狀態已非常勇，加上跑法具彈性，機會相當樂觀喎！