香港有一個「新聞教育基金」，成員皆是資深傳媒人，有心有力。你知啦，在今天傳媒界，搵食不易，傳媒僱員從來每要求加薪，零舍難過人，想追求高薪，記者編輯無不轉行做PR（公共關係）、PA（公共事務），或IR（投資者關係），剩番一啲大哥大姐級人馬，工作辛苦之餘，還有理想追求香港新聞歷史的傳承，當然值得尊敬。
新聞教育基金籌得開辦費，得到必列啫士街街市嘅保育發展權，可將呢座歷史性建築物改建為香港新聞歷史博物館，存藏及展覽香港新聞歷史記錄及文物，左丁山算係一個傳媒人，自然樂觀其成，之不過，在香港講保育，好多人大把聲氣，到項目完成嘞，困難先至浮現，就係如何自負盈虧，達致古蹟活化嘅目的，而唔係空有「古蹟」外殼，內裏死氣沉沉，連年入不敷支，令到乜乜基金會、理事會成員硬着頭皮，沿門托缽咁搵富豪捐錢，或猛寫申請書哀求民政事務局撥款支撐住。以上唔係亂講㗎，五十年代建成嘅李鄭屋古墓，二十一世紀設立嘅甘棠第，好彩有政府公帑力挺嘅啫，平時入內欣賞古蹟嘅人流，寥寥可數呀！開辦不久嘅饒宗頤展覽館，主辦單位要自負盈虧，據知情人士話：「情況極具挑戰性！」希望他日新聞博物館落成之後，真係可以營運成功啦！
香港情況特殊，與外地完全不同，不可天真地引用外國例子嚟論述香港一無是處。九月十六日蘋果日報報導蘇格蘭獨立公投嘅新聞，附帶講及愛丁堡舊城保育，訪問一位賴建國先生，佢話蘇格蘭重建舊區，先在重建大廈旁建一座大廈，讓居民遷入暫住，當新大廈建成，居民就可搬回新建樓宇，「絕對不事先趕人，也不像香港般整片拆建。」咁樣做法，當然正斗，但就算香港市建局搵賴建國先生做顧問，如重建灣仔或觀塘或旺角或深水埗舊街，請問如何可以找到舊大廈旁一塊空地嚟興建一座大廈俾居民暫住？蘇格蘭大過香港30倍，人口仲少過香港（約五百三十萬人），將城市居民搬來搬去，容易過香港幾百倍啦，千祈唔好將蘇格蘭舊區重建與香港情況相比呀！