Don't kill your wife, let us do it！喺倫敦行街時，見到間舖頭呢句slogan，心諗有冇咁好景呀，做殺手都可以開地舖？望清楚，原來係洗衣舖，呵呵。其實係畀太太們睇嘅，唔好咁辛苦，粗重嘢會做死人㗎，啲衫交畀我哋洗啦！
經過間賭波公司，又見到兩句金句，第一句係畀贏錢客，When you win it's skill！第二句畀輸錢客，When you lose it's luck！嘩贏錢就因為好波，輸波就係冇運，賭仔聽得舒服又落多兩注，唔賭唔知技術好嘛，口號呢家嘢，查實一半事實一半夢想，代入到就有歸屬感。
英國最流行嘅口號，唔係利記嘅You will never walk alone，而係Keep calm and carry on，由打仗年代作為政府宣傳語句，到而家變咗商品化嘅9萬幾款Keep clam and xxx，相當百搭，非常英國style。
香港地家陣正值大是大非年代，香港隊又分別南征北討，明明好需要大家發聲，但就搵極搵唔到香港嘅節奏，嗌唔響口。冇計，香港人不嬲唔係幾like口號，而家陣喺球場上最流行嘅We are Hong Kong就真係for遊客多過for香港人囉！廣東話真係咁難嗌出囗咩？大家爆粗嗰陣好齊㗎喎。
呢味嘢韓國人勁好多，02世界盃球迷嗌「嗲坑眠哥」不知幾震撼，但係仁川亞運又怪喎，睇見佢哋大會口號明明係diversity shines here，強調多元化。點知開幕主題就變咗one asia，懶係共融咁。講乜鬼同一個亞洲呢又，家陣能夠大一統全人類嘅，其實只得iPhone啩。
講番香港，未來戰役多多，係時候喺網上搵啲Hong Kong style嘅口號啦！例如：「香港要贏，XX要輸」呢句，夠直接，有霸氣！萬一係落後呢，咁就不妨自嘲一吓，嗌聲：「XX嘅嘢，識條X咩！」但係想表達無論環境順逆都咁錫你嘅地頭，不妨來一句：「香港，不解釋！」
KEYMAN
節目主持
mailto:[email protected]