勢估唔到落飛黨今季咁早「開工」，因為始終係季初，馬嘅狀態未十足，而且經過一個暑假，好多暗牌馬突然有大進步都唔奇，點知落飛黨依然睇得咁準，抵佢發達。
唔知落飛黨今次會唔會吼中第五場「狄奧圖」呢？話晒熱過身，開鑼日用呂卓賢跑四班1400米，面對「執到寶」、「珍珠旺」、「津津樂道」同「君悅灣」等惡馬，比較難突圍，跑第五已唔錯。今次隔一個禮拜匆出，唔單止跑番贏馬路程1600米，仲換上韋達，呢兩項優點已夠贏之餘，對手亦冇上次咁惡，睇嚟有機會成為葉廐開齋馬。
徐、苗、摩、沈、方廐今季都連贏兩個賽日，估計季初攻勢冇咁快會停。今次徐廐馬中最鍾意「天狼星」，上季尾開始見好，可見個分已減到差唔多。呢兩期賽事有「執到寶」、「十二門徒」等上季尾好開嘅馬繼續好，估計「天狼星」會趁季初對手各有不足下搏命。