九月十五日香港泰國商會召開周年大會，在香港會舉行，附設午餐，當然全由主席陳智思主持。今年年會午餐原來有一個主題，左丁山事先居然唔知，到場之時，AGM已近尾聲，工作人員通知，飯後有一個討論會，係講「香港——東盟自由貿易協議」。
午餐好快食完，一點正就開始討論會，陳智思介紹幾位講者，原來有兩位專程由曼谷飛過來參加嘅，其一係泰國最大企業集團「卜蜂」嘅執行董事，其二係泰國商業部嘅貿易專員，第三位係城市大學商學院Mondejar（文德彬博士，菲律賓人，在城大主持東盟研究），第四位係香港投資推廣署一位外籍官員。
中國與東盟簽訂自由貿易協議後，香港主動要求與東盟簽訂同樣嘅Free Trade Agreement（FTA），林鄭月娥與曾俊華曾因此由陳智思陪同訪問泰國，林鄭又去過大馬，尋求支持，但聽講進展緩慢喎，東盟成員國並不十分着緊，唱晒慢板，聽講者所言，最快要到2016年先至有眉目。
香港素來係自由貿易港，何解與東盟簽FTA，人地唔係太歡迎呢？原因好簡單，就係全世界都可以來香港開公司，做任何生意，運貨來港，毋須關稅，但香港貨去東盟，香港服務業去東盟，處處有關卡，有關稅，換句話說，香港早已門常開，要求一個門常關嘅經濟體系開門，自不然係你緊張啫，人地懶懶閒啦。
有出席人士提出即使香港與東盟簽訂FTA，有何得益？卜蜂嘅執行董事答得妙：香港人似乎對東盟文化冇乜興趣，除去旅行飲食玩樂之外，香港人、香港學生甚少研究東南亞各國語言文化，香港中學不知有無東盟學生，大學只收極少數東盟學生，香港大學生又似乎不願意到東盟留學或者做交換生，簽了協議之後，倘若無人入局，主動與東盟國家交往，也是徒然。陳智思感嘆云，有公司想到柬埔寨金邊開分公司，但香港僱員對外派金邊全無興趣，最後嗰間公司要到曼谷搵泰國人去金邊。香港的確如此，做生意，只北望大陸，東看美國、日本，西看歐洲，對鄰近嘅東南亞地區，真係冇乜人恨去，或者做研究，過去如是，現在也是如此，幾短視㗎！