TVB管理層嘅「慳儉」作風遠近馳名，連患腦退化症嘅「光纖之父」高錕都知。高錕早幾年出自傳，最新印刷嘅修訂版，加入高太黃美芸寫嘅兩個章節。其中一章講到，當年高錕獲諾貝爾獎後，獲無綫邀請，話有隊攝製隊長駐美國加州，想搵佢哋做多幾次訪問，為高錕製作生平紀錄片。
高錕兩公婆都識六叔，高太就寫咗封信畀六嬸方逸華，同佢講做訪問都得，不過就想無綫先捐錢畀美國阿茲海默協會同香港一間慈善團體。
結果方小姐回信，話電視台覺得手上嘅片夠晒，唔會去諾貝爾頒獎禮打擾佢哋喇，即係連錢都唔會捐。及後有朋友同高太講：「方小姐出名手緊，休想她手上會漏出一毛錢。」
新修訂嘅《高錕自傳》已經有售，為咗慶祝高錕慈善基金成立四周年，仲會推出只有100本嘅特別紀念版，邀請100位名人認購，包括中大校長沈祖堯、周潤發、胡楓、譚詠麟等，每本盛惠3.8萬蚊，為基金籌得380萬蚊善款。噚日高錕都有短暫出席基金會活動，精神十足，相當精靈。