禮拜日（19日）嘅頭場四班1400米，有兩隻由三班降落嚟嘅馬列陣，分別係「喜利高」同「匯聚力量」，咁啱得咁蹺都同13屆冠軍騎師韋達有關。
點解咁講呢？「匯聚力量」本月6日由韋達試1000米草閘，以凌厲衝刺奪勝，跑贏同組九匹比佢高分嘅對手，表現相當突出。至於「喜利高」，賽前亦由韋達試閘，喺本月10號泥地1200米大閘有前有後之下跑第一。既然兩隻馬都咁fit，韋達一定好頭痕，患上選擇困難症；按理佢應該騎「喜利高」，畢竟上季喺四班合作贏過，相反「匯聚力量」在港兩季17戰，從未入三甲，但結果韋達偏偏揀「匯聚力量」，相信係經過仔細考慮。
事實上「匯聚力量」上季尾已經越跑越好，7月喺同程1400米配何澤堯發揮麻麻，排外檔全程四五叠蝕位無數，直路又出頭太早之下，臨尾仍保住一席殿軍，實力絕對唔簡單，反映已開始適應水土。嗰場頭馬係公認實力強橫，已經評78分嘅「太陽驕子」，家陣「匯聚力量」先得57分，又難怪韋達揀佢！