【銅鑼灣→跑馬地】現年29歲嘅餅碎楊愛瑾（Miki）同永安集團太子爺郭永淳唔經唔覺都已經拍咗差不多5年拖，都應該已經去到打風都打唔甩嘅地步，但係唔知點解都仲好避忌。
話說前晚7點幾，着住白裙仔嘅Miki同男友郭永淳喺銅鑼灣排隊等小巴，準備去跑馬地。可能仲係接近放工時間，當時人龍都好長，呢個時候Miki發揮佢嘅口技，不停口同男朋友講嘢解悶，聽足5分鐘之後郭永淳忍唔住用手搭住女朋友膊頭，一臉甜蜜嘅Miki好滿足咁收口。等到第3架車佢哋可以上車，當去到跑馬地時，兩個人就忽然變得好陌生，落車之後隔開前後3個身位行，好避忌咁前後腳入咗跑馬地一間馳名食粥粉麵嘅店舖。
買蘋果獨享
兩個人速食二十分鐘左右就離開，Miki率先步出邊行邊準備等男友時，郭永淳施施然行出食店，但完全冇意思追上前會合女朋友，今次仲隔住10個身位前後行。
可能郭永淳知道跑馬地多記者出沒，所以冇好似喺銅鑼灣時咁親密搭女友膊頭。畀男朋友搞到好冇癮嘅Miki惟有一個人行咗入間生果店，買咗一個蘋果咁大把就離開。而呢個時候男朋友郭永淳仲失埋蹤，Miki就拋吓拋吓個蘋果一個人返屋企。
採訪、攝影：徐錦池、楊浩賢
