金管局總裁陳德霖噚日走出國金，去牛頭角上邨主持硬幣回收計劃嘅啟動儀式，幾受「順嫂」歡迎㗎。對住一大堆神沙，原來勾起陳總唔少童年回憶。佢話記得好清楚讀小學同中學嘅時候，每日放學返屋企，父母就會畀一蚊三毫子佢，每日都$1.3，唔多唔少。因為當時1毫子就買到1個菠蘿包或雞尾包，2毫子就買到支維他奶，午餐食碟頭飯唔加蛋係1蚊雞，所以$1.3剛好夠佢食早餐同午餐。
佢又叫市民千祈唔好睇少碎銀，因為銀仔見證香港開埠咁多年嘅發展，係香港人歷史同生活嘅一部份，又話喺十九世紀，1文錢聽講可以買到一份白粥同麵包，1毫子已經係兩日嘅人工喇。