「海鷗」來得快時去得亦快，今次8號風球喺中午前落波，打工仔下晝急趕返工，而球隊嗰朝就唔使操，下晝冇嘢搞走落旺角相熟茶檔坐吓，睇吓有冇球圈人好似我咁。
點知就撞到流浪漢米高哥，坐埋先講佢哋港超聯首戰因防守唔集中，無厘頭完半場前失波，最後追唔返，首戰輸波，同佢隊英超愛隊兵工廠一樣，上場反先曼城，點知轉頭又輸角球被逼和，防守差到冇朋友，家陣踢咗4場得6分排到第7，周中歐聯分組賽第一擊仲衰埋畀多蒙特，都唔知雲格點搞。
後防唔掂勢多入球
佢話今晚作客阿士東維拉分分鐘香埋，我話十萬八千里咁遠，係愁都憂吓自己隊波先好喇！米高諗諗吓都同意我講法，仲話會用念力發功畀雲格，希望阿仙奴今晚有波入，仲唔止一球，因為驚佢前面入埋唔夠後面失，所以入多啲先掂。我心諗，輸波又有波入，即係全場入球「大」？睇吓賠率，呢場維拉對兵工廠入球「大」有1.85倍又唔錯喎，記低先。
講完英超，問佢第一場波輸咗有咩對策，佢話：「新搵球員就冇，不過有個喺美國出世嘅𡃁仔叫伍杰森，終於搞掂本哋身份註冊，聽日可以多個人調動吓。」我話咁咪好囉，但佢面燶燶咁話：「註冊過程都不知幾多波折，先係處理要唔要工作證，佢唔喺香港出世，又要引例用老竇喺香港出世去註冊為本地球員身份，可惜佢老人家兩歲就去咗美國，連姓都改埋，少啲耐性都搞唔掂，最後仲要自己搵香港足總球例書出嚟做證明先至搞掂。」我聽佢講過程都覺煩，第二個可能一早放棄咗，佢最後都搞到，值得一讚！
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive