早排八方寫咗教育局局長吳得掂會喺學聯罷課期間放大假，政圈中人竊竊私語，連李偲嫣都話要吳得掂交代點解走咗去唔理罷課。原本政圈中人以為，冇咗吳得掂唔緊要，仲有佢個奶媽、政務司司長林鄭月娥坐鎮，點知政府噚日出稿，原來連奶媽都喺罷課期間放大假。咁由邊個代奶媽睇場？原來係根正苗紅、對中共搞學運、港英點樣打擊學運都瞭如指掌嘅民政事務局局長曾德成。
話冇罷過課只係派傳單
政府噚日宣佈，奶媽會係9月24日到9月28日放假，由德成局長署任政務司司長，而呢段時間剛剛好同大罷課重叠，學聯指奶媽係政改三人組之首，會請佢去罷課集會回應普選訴求，𠵱家佢避開學生去放假，咁算點先？
不過有政圈口痕友話，今次奶媽放假其實放得好，事關頂佢嘅德成局長，正好喺全國河山一片紅嘅年代，好似黃之鋒咁以中學生身份，為祖國投身打倒港英嘅運動。德成局長噚日話自己從來冇罷過課，但佢當年因為喺學校派反港英單張而被判監，理應好明白學生為理想而罷課想法，冇理由唔同情、甚至唔支持學生啩。
不過從政嘅人，屁股指揮腦袋，當日德成局長反英反殖，就梗係同情學運，今日佢係當權者就未必咁諗，好似「愛港之聲」高達斌，噚日喺公開大學政改論壇上，指搞罷課嘅人好似黑社會叫青少年走歪路一樣，教壞人去食白粉、走私，令在場70名公大學生譁然，高達斌卻拒絕道歉。
李八方
mailto:[email protected]