大哥大洪金寶隻愛駒「崇山寶」，向來受到馬迷愛戴，實力亦非常強勁，3月底喺杜拜角逐一級賽阿喬期短途錦標，當晚一放到底勝出為港爭光，相信大家都記憶猶新。不過可能嗰場用力太多，隻馬返港後較少喺晨課露面，直至經過暑假休息，體力先全面回復。
呢一日（19日）「崇山寶」終於再配上着綵衣嘅騎師雷神，不過就唔係真正比賽，而係季內首度試閘，冇見一排隻馬比上季更強壯更成熟，而且充滿角逐興趣，一起步就彈出，全程以極佳速度帶放取勝，表現有大將之風，睇嚟踏入五歲戰鬥力再進一步。至於同組出試嘅上季最佳一哩馬「大運財」，就以強橫後勁鏟入第四，走勢亦好矚目。
同日喺泥地1200米大閘勝出嘅「帶運伯樂」，亦值得備忘，呢匹馬速度驚人，大勝對手六個馬位，與上季比較好似變咗另一匹馬咁，所造時間亦較同日另外三組同程頭馬快好多。「帶運伯樂」今季喺五班起步，評分比初來港時已減一大截，如果稍後喺泥地1200米上陣，真係唔好睇低呀！