民陣俾康民署打壓，拒絕按照慣例租出維園草地畀市民十．一遊行前集會，一向唔睇好泛民遊行人數嘅民記議員元秋蔣麗芸，噚日為死撐康文署，破天荒唱好民陣申請五萬人參加嘅十．一遊行，話最終個遊行「唔好話我聽得幾百人，肯定有成幾十萬人參與啦」，因此康文署唔批草地畀民陣做法正確，「假如民政總署真係批畀民陣，就真係匪夷所思囉！」
元秋話因為屆時遊行人士一定會同隔籬慶祝國慶人士，包括佢自己「碰碰撞撞」喎。元秋又話，覺得政改慢慢行就最啱，唔應該太急進，自爆：「你估我又好鍾意共產黨咩？唔係！我係睇到大形勢、睇到大局啫」。虎父果然無犬女，曾投身「自由中國運動」嘅蔣震老先生，八方恭喜你，女承父業呀！